ភ្នំពេញ៖ រដ្ឋលេខាធិការដ្ឋានអាកាសចរស៊ីវិលបានឱ្យដឹងថា អង្គការអាកាសចរណ៍ស៊ីវិលអន្តរជាតិ (ICAO) បានវាយតម្លៃ និងផ្ដល់វិញ្ញាបនប័ត្រចំណាតថ្នាក់លេខ២ ក្នុងការប្រកួតវីដេអូប្រកួតប្រជែងក្នុងកិច្ចខិតខំប្រឹងប្រែងដើម្បីគាំទ្រ និងលើកកម្ពស់វប្បធម៌សន្តិសុខរបស់ ICAO។ 

អ្នកនាំពាក្យរដ្ឋលេខាធិការដ្ឋានអាកាសចរស៊ីវិលលោក ស៊ិន ចាន់សិរីវុត្ថា បានឱ្យ EAC News ដឹងថា អាកាសយានដ្ឋានអន្តរជាតិភ្នំពេញស្ថិតក្នុងអាកាសយានដ្ឋានអន្តរជាតិ៣ទៀតដែលបានជាប់ចំណាត់ថ្នាក់កំពូល ក្នុងការប្រកួតប្រជែងដែលមានប្រទេសចំនួន១៦ បានដាក់ពាក្យប្រកួតប្រជែង។ 

បើតាមលោក ស៊ិន ចាន់សិរីវុត្ថា ចំណាត់ថ្នាក់លេខ១ បានលើអាកាសយានដ្ឋានអន្តរជាតិ Seattle-Tacoma ក្នុងរដ្ឋ Washington របស់សហរដ្ឋអាមេរិក ខណៈលេខ៣ បានទៅលើអាកាសយានដ្ឋានVáclav Havel ទីក្រុង Prague សាធារណរដ្ឋឆេក។ 

ការរៀបចំការប្រកួតប្រជែងនេះគឺដើម្បីជួយបង្ហាញវប្បធម៌សន្តិសុខអាកាសចរណ៍ប្រកបដោយប្រសិទ្ធភាពក្នុងទម្រង់កម្សាន្ត និងទាក់ទាញ។ ឆ្នាំនៃវប្បធម៌សន្តិសុខរបស់ ICAO គឺជាការអំពាវនាវឱ្យភាគីពាក់ព័ន្ធទាំងអស់ចាត់វិធានការចំពោះនៅក្នុងសហគមន៍អាកាសចរណ៍ពិភពលោកដើម្បីអភិវឌ្ឍការអនុវត្តល្អបំផុត និងអនុវត្តវប្បធម៌សន្តិសុខដ៏រឹងមាំ និងមានប្រសិទ្ធភាពនៅក្នុងស្ថាប័នរបស់ពួកគេ៕